راز ٹی وی اردو
گجرات : مائیگرنٹ ریسورس سینٹر نے ، ضلع گجرات، تحصیل جلالپورجٹاں،میں ایثار ویلفیئر سوسائٹی کے تعاون سے محفوظ اور قانونی ہجرت پر آگاہی سیشن کا انعقاد کیا۔ اس آگاہی سیشن میں انسپیکٹر بدر بشیر نے ایف آئی اے کی نمائندگی کی۔ سیشن میں ارفان مرزا ، صدر ایثار ویلفیئر سوسائیٹی ، نوید بٹ چئیرمین ، ڈاکٹر ثاقب ، شہزاد شاہ ، اور دیگر ممبران نے اہل علاقہ کی کثیر تعداد کے ساتھ خصوصی شرکت کی۔
۔سیشن کا مقصد لوگوں کو بیرونِ ملک ملازمت،تعلیم یا رہائش کی غرض سے ہجرت کے حوالے سے مستند معلومات فراہم کرنے کے علاوہ غیر قانونی ہجرت اور اس سے جڑے خطرات کے بارے میں آگاہی فراہم کرنا ہے۔ سیشن میں ایم آرسی کاؤنسلر ماریہ سہیل کا کہنا تھا کہ اگر ہجرت کا ارادہ ہو تو ہمیشہ قانونی ہجرت کا انتخاب کریں اور اپنی جان و مال کی حفاطت کریں۔ زیادہ تر لوگ ہجرت کا انتخاب بہتر مستقبل کے حصول کے لیے کرتے ہیں، اورتحقیق کے مطابق غیرقانونی ہجرت کواپنانے کی بنیادی وجہ مستند معلومات کا فقدان ہے، زیادہ تر لوگوں کا یہ خیال ہے کہ وہ غیر قانونی ہجرت کے ذریعے اپنے پسندیدہ ملک باآسانی، کم پیسوں میں اور جلد پہنچ جائیں گے جبکہ سچائی اسکے برعکس ہے۔
سیشن میں یہ بھی بتایا گیا کہ بیرونِ ملک ملازمت کی تلاش کے لیے ہمیشہ حکومت کی جانب سے رجسٹرڈ لائیسنس یافتہ بھرتی کی ایجنسی یا حکومت کے قائم کردہ اورسیز ایمپلائمنٹ کارپوریشن سے رابطہ کریں۔ایم آر سی کونسلر نے بتایا کہ ایم آرسی ان آگاہی سیشن کا انعقاد پنجاب اور خیبر پختونخواہ کے مختلف اضلاع میں کررہا ہے تاکہ لوگوں کو قانونی اور محفوظ ہجرت کے بارے میں تمام معلومات مفت فراہم کی جاسکے۔بدر بشیر انسپیکٹر ایف آئی اے نے ایم آرسی کی کاوشوں کوسراہتے ہوئے کہا کہ نوجوانوں کو قانونی ہجرت کے حوالے سے مستند معلومات کے لئے ایم آرسی اور متعلقہ حکومتی اداروں سے رابطہ کرنا چاہیے تاکہ آپ محفوظ اور قانونی ہجرت کا انتخاب کرسکیں ۔ شرکاء نے بھی معلومات کو بہت مفید قرار دیا۔اور ایم آرسی کی کاوششوں کو سراہا۔
ایم آرسی پاکستان کے بارے میں
مائیگرنٹ ریسورس سنٹر 2016 میں بیرون ِ ملک جانے والے خواہشمند افراد کی رہنمائی کے لیے پشاور، اسلام آباد میں وزارتِ سمندر پارپاکستانی و ترقی و انسانی وسائل اور لاہور میں محکمہ لیبر وانسانی وسائل، حکومتِ پنجاب کی سرپرستی میں قائم کیا گیا۔ایم آرسی، انٹرنیشنل سینٹر فار مائیگریشن پالیسی ڈویلپمینٹ کا ایک ذیلی ادارہ ہے اور اس کی مالی معاونت یورپی یونین کر رہی ہے۔ ایم آرسی بیرون ِ ملک جانے کے خواہشمند افراد کو ہجرت سے متعلق تمام معلومات اور رہنمائی مفت فراہم کرتا ہے،تاکہ وہ بیرونِ ملک جانے کے لیے بہتر اور محفوظ فیصلہ کرسکیں۔ ذاتی مشاورت،روانگی سے قبل معلوماتی سیشن، تعلیم و فنی اداروں کے ذریعے آگاہی پروگرام کا انعقاد کرنا اسکی بنیادی خدمات میں شامل ہے
ڈسکلیمر/نوٹ:
یہ معلوماتی مواد مائیگرنٹ ریسورس سنٹر نے مرتب کیا ہے ۔ یورپی کمیشن اس میں موجود معلومات کے استعمال کی کوئی ذمہ داری قبول نہیں کرتا ہے
